About DALaM

ກົມຄຸ້ມຄອງ ແລະ ພັດທະນາທີ່ດິນກະສິກຳ ສ້າງຕັ້ງຂື້ນໃນປີ 2012, ເພື່ອຈຸດປະສົງແນ່ໃສ່ຈັດຕັ້ງປະຄິບັດແນວທາງ, ນະໂຍບາຍຂອງພັກ, ກົດໝາຍຂອງລັດ ແລະ ລະບຽບການ ກ່ຽວກັບວຽກງານຄຸ້ມຄອງ ແລະ ພັດທະນາທີ່ດິນກະສິກຳ ໃນຂອບເຂດທົ່ວປະເທດໃຫ້ໄປຕາມທິດທີ່ຢືນຍົງກົມຄຸ້ມຄອງ ແລະ ພັດທະນາທີ່ດິນກະສິກຳ ຂຽນເປັນຕົວອັກສອນຫຍໍ້ວ່າ ” ຄພດກ ” ແມ່ນອົງການຈັດຕັ້ງໜື່ງສັງກັດໃນກົງຈັກການຈັດຕັ້ງຂອງກະຊວງກະສິກຳ ແລະ ປ່າໄມ້.

1. ປະຕິບັດ ລັດຖະທຳມະນູນ, ກົດໝາຍ ແລະ ມະຕິຂອງສະພາແຫ່ງຊາດ, ລັດຖະບັນຍັດຂອງປະທານປະເທດ, ດຳລັດ, ມະ ຕິຂອງລັດຖະບານ, ຂໍ້​ຕົກລົງ, ຄຳ​ສັ່ງ, ​ແຈ້ງ​ການ, ຄຳ​ແນະນຳ ຂອງ​ຂັ້ນ​ເທິງ​ວາງ​ອອກ;
2. ຄົ້ນຄວ້າ, ຜັນ​ຂະຫຍາຍແນວທາງນະໂຍບາຍຂອງພັກ, ແຜນຍຸດທະສາດຂອງຂະແໜງກະສິກໍາ ແລະ ປ່າໄມ້ ມາເປັນແຜນງານ ແລະ ໂຄງການສະເພາະຂອງຕົນ ພ້ອມທັງຄຸ້ມຄອງ ແລະ ຈັດຕັ້ງປະຕິບັດໃຫ້ໄດ້ຮັບຜົນ;
3. ຄົ້ນຄວ້າ, ນຳສະເໜີ ແລະ ປັບປຸງກົງຈັກການຈັດຕັ້ງ ພ້ອມທັງກຳນົດຕຳແໜ່ງງານໃຫ້ຄົບຖ້ວນ, ສ້າງແຜນກຳນົດພະນັກງານນໍາພາ-ຄຸ້ມຄອງ ແລະ ແຜນການບໍາລຸງກໍ່ສ້າງພະນັກງານ-ລັດຖະກອນ ໃນແຕ່ລະໄລຍະ;
4. ຄົ້ນຄວ້າ, ນໍາສະເໜີ ສ້າງ, ປັບປຸງນິຕິກໍາ ກ່ຽວກັບວຽກງານຄຸ້ມຄອງ ແລະ ພັດທະນາທີ່ດິນກະສິກໍາ ພ້ອມ​ທັງເຜີ​ຍ​ແຜ່​ອອກ​ສູ່​ສັງຄົມ​ຢ່າງ​ກວ້າງ​ຂວາງ;
5. ສຶກສາ, ຄົ້ນຄວ້າ, ສຳຫຼວດ, ຈັດສັນ, ຈັດປະເພດ ແລະ ວິໄຈ ​ເພື່ອປະເມີນຄຸນນະພາບຂອງດິນ, ແບ່ງເຂດການຜະລິດກະສິກຳ ​​ແລະ ວາງແຜນນຳໃຊ້ທີ່ດິນກະສິກຳ ຕາມທິດຍືນຍົງ;
6. ໃຫ້ການບໍລິການວິໄຈດິນ, ຝຸ່ນ, ພືດ, ຈຸລິນຊີ ແລະ ບໍລິການ ການສຳຫຼວດ, ວາງແຜນນຳໃຊ້ທີ່ດິນກະສິກຳ ທີ່​ມີ​ປະສິດທິພາບ ​ແລະ ​ເປັນ​ມິດ​ຕໍ່​ສິ່ງ​ແວດ​ລ້ອມ;
7. ສ້າງຄວາມ​ເຂັ້ມ​ແຂງ​ທາງ​ດ້ານ​ວິຊາ​ການດິນ ​ໃຫ້​ພະນັກງານ ຂັ້ນ​ແຂວງ, ​ເມືອງ ​ແລະ ຂັ້ນບ້ານ ເປັນຕົ້ນແມ່ນໝໍດິນ;
8. ປະສານສົມທົບກັບພາກສ່ວນກ່ຽວຂ້ອງ ດຳເນີນການເກັບກຳຂໍ້ມູນ, ຂຶ້ນສຳມະໂນ, ອອກໃບຢັ້ງຢືນການນຳໃຊ້ ແລະ ການພັດທະນາທີ່ດິນກະສິກຳ ເພື່ອ​ເປັນ​ຫຼັກ​ຖານ​ໃນ​ການອອກໃບຕາດິນ;
9. ຄົ້ນຄວ້າ ປະກອບຄຳເຫັນດ້ານ​ວິຊາ​ການ ໃນການອະນຸມັດໃຫ້ເຊົ່າ, ສຳປະທານ, ການຫັນປ່ຽນທີ່ດິນກະສິກຳໄປສູ່ເປົ້າໝາຍອື່ນ ເພື່ອເປັນເຄື່ອງມືໃນການຄຸ້ມຄອງທີ່ດິນກະສິກໍາ ຕາມທ່າແຮງ ແລະ ສະ ພາບເງື່ອນໄຂຕົວຈິງ ຂອງແຕ່ລະທ້ອງຖິ່ນ;
10. ​ເກັບ​ກຳ ​ແລະ ສ້າງ​ຖານ​ຂໍ້ມູນທີ່​ດິນ​ກະສິກຳ ​ເພື່ອ​​ຕິດຕາມ, ​ກວດກາ ​ແລະ ປະເມີນຜົນ ກ່ຽວ​ກັບ​ການຄຸ້ມ​ຄອງ​ການນຳໃຊ້ທີ່ດິນກະສິກຳ;
11. ສຶກສາ, ຄົ້ນຄວ້າ, ທົດລອງ, ທົດສອບ, ສາທິດ ເພື່ອຊອກຫາຮູບແບບ ເຕັກນິກວິທະຍາສາດ ແລະ ເຕັກໂນໂລຊີໃນການນຳໃຊ້, ການປັບປຸງບູລະນະ, ການອະນຸລັກ ແລະ ພັດທະນາທີ່ດິນ ເພື່ອການຜະລິດກະສິກໍາ ຕາມທິດຍືນຍົງ;
12. ຄຸ້ມ​ຄອງ, ຕິດຕາມ, ວິ​​ໄຈ ​ແລະ ທົດ​ສອບ ​ເພື່ອ​ຢັ້ງຢືນ​ຄຸນ​ນະພາ​ບຝຸ່ນ​ທີ່​ຜະລິດ, ການ​ນຳ​ເຂົ້າ​-ສົ່ງ​ອອກ ​ແລະ ຈຳໜ່າຍ ພາຍ​ໃນ​ປະ​ເທດ ລວມທັງ​ວັດຖຸ​ດິບ ທີ່​ນຳ​ມາ​ຜະລິດ​ຝຸ່ນ, ກຳນົດ​ອັດຕາ ​ແລະ ​ໃຫ້​ຄຳ​ແນະນຳ​ໃນ​ການ​ນຳ​ໃຊ້​ຝຸ່ນ ​ເພື່ອ​ຍົກ​ຜະລິດ​ຕະພາບ ໃຫ້ໄດ້ຮັບຜົນ;
13. ພົວພັນ ແລະ ຮ່ວມມືກັບພາກສ່ວນກ່ຽວຂ້ອງ ທັງພາຍໃນ ແລະ ຕ່າງປະເທດ ເພື່ອຍາດແຍ່ງເອົາການຊ່ວຍເຫຼືອ ທາງດ້ານເຕັກນິກວິຊາການ ແລະ ທຶນຮອນ ​ເຂົ້າ​ໃນ​ການຈັດຕັ້ງປະຕິບັດບັນດາແຜນງານ, ແຜນການ ແລະ ໂຄງການ ໃນຂົງເຂດວຽກງານຂອງຕົນ;
14. ສ້າງແຜນດຳເນີນງານ, ແຜນການ ແລະ ແຜນງົບປະມານປະຈຳປີ ພ້ອມທັງຄຸ້ມຄອງ, ຕິດຕາມ, ກວດ ກາ, ສະຫຼຸບ-ຕີລາຄາ, ປະເມີນຜົນການຈັດຕັ້ງປະຕິບັດ ແຜນງານ, ແຜນການ, ບັນດາໂຄງການ ​ແລະ ກິດ​ຈະ​ກຳ​ຕ່າງໆ ລວມທັງ​ການ​ໃຊ້​ຈ່າຍ​ງົບປະມານທີ່ກົມຮັບຜິດຊອບ ຢ່າງ​ເປັນ​ລະບົບ​ຕໍ່​ເນື່ອງ;
15. ປະກອບສ່ວນ​ເຂົ້າ​ໃນ​ການພັດ​ທະນາ​ບັນດາ​ວິທະຍາ​ໄລ ​ແລະ ໂຮງຮຽນ ທີ່​ຂຶ້ນກັບ​ກະຊວງ​ກະສິກຳ ແລະ ປ່າ​ໄມ້ ພ້ອມ​ທັງ​ສະໜອງດ້ານ​ເຕັກນິກ​, ວິຊາ​ການ ​ແລະ ສິ່ງ​ອຳນວຍ​ຄວາມ​ສະດວກ​ຕ່າງໆ ​ໃຫ້​ບັນດາ​ສູນ, ສະຖານີ ຢູ່​ຂັ້ນ​ທ້ອງ​ຖິ່ນ ໃຫ້​ມີ​ຄວາມ​ເຂັ້ມ​ແຂງ;
16. ​ປະຕິບັດໜ້າທີ່ອື່ນ ຕາມການຕົກລົງ ແລະ ມອບໝາຍຂອງຂັ້ນ​ເທິງ.

1. ສະເໜີປັບປຸງກົງຈັກການຈັດຕັ້ງຂອງຕົນ ຕໍ່ກະຊວງກະສິກຳ ແລະ ປ່າໄມ້, ກຳນົດຕຳແໜ່ງງານ, ບັນຈຸ-ສັບຊ້ອນ ແລະ ຈັດວາງ ບຸກຄະລາກອນ ຕາມການແບ່ງຂັ້ນຄຸ້ມຄອງ ທີ່ກົດໝາຍ ແລະ ລະບຽບການກຳນົດ ຕາມທິດກະທັດລັດ, ເຂັ້ມແຂງ ແລະ ມີປະສິດທິພາບ;
2. ຊີ້ນຳ, ຄຸ້ມຄອງ ຕາມສາຍຕັ້ງທາງດ້ານເຕັກນິກ, ວິຊາການ ໂດຍມີການແບ່ງຂັ້ນ, ແບ່ງຄວາມຮັບຜິດ ຊອບ ແລະ ແບ່ງສິດ ໃນການຕົກລົງບັນຫາ ຢ່າງລະອຽດ, ຈະແຈ້ງ;
3. ຮຽກໂຮມພະນັກງານນຳພາ-ຄຸ້ມຄອງ ແລະ ວິຊາການ ໃນຄວາມຮັບຜິດຊອບຂອງຕົນ ເຂົ້າຮ່ວມກອງປະຊຸມ ຫຼື ລາຍງານສ່ອງແສງວຽກງານ ເປັນແຕ່ລະໄລຍະ, ເຂົ້າຮ່ວມວາງສະແດງສິນຄ້າກະສິກຳ ແລະ ກົນຈັກກະສິກຳ, ຕະຫຼາດນັດ, ຝຶກອົບຮົມ, ສຳມະນາວິຊາການ ແລະ ລົງເຮັດວຽກຢູ່ທ້ອງຖິ່ນ-ຮາກຖານ ຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ ຕາມທີ່ໄດ້ກຳນົດໃນລະບຽບການທີ່ກ່ຽວ ຂ້ອງ;
4. ຄົ້ນຄວ້າ ແລະ ປະກອບຄຳເຫັນ ກ່ຽວກັບການລົງທຶນ ພາຍໃນ ແລະ ຕ່າງປະເທດ ດ້ານກະສິກຳ, ປ່າ ໄມ້ ແລະ ພັດທະນາຊົນນະບົດ ບົນພື້ນຖານກົດໝາຍ ແລະ ລະບຽບການໃນແຕ່ລະໄລຍະ;
5. ຄຸ້ມຄອງ ແລະ ນຳໃຊ້ງົບປະມານ, ຊັບສິນຂອງລັດ, ການຈັດຕັ້ງປະຕິບັດພາລະບົດບາດ ແລະ ໜ້າທີ່ຄວາມຮັບຜິດຊອບຂອງຕົນ ຕາມກົດໝາຍ ແລະ ລະບຽບການກຳນົດໄວ້;
6. ຄົ້ນຄວ້າ ແລະ ສະເໜີເລື່ອນຊັ້ນ-ຂັ້ນ​ເງິນ​ເດືອນ, ຍ້ອງຍໍ, ຍົກຍ້າຍໜ້າທີ່, ປົດຕຳແໜ່ງ, ສັບຊ້ອນ, ຈັດວາງ, ປະຕິບັດວິໄນ, ຄຸ້ມຄອງ, ນຳໃຊ້ ແລະ ປະຕິບັດນະໂຍບາຍອື່ນໆ ຕໍ່ພະນັກງານ ທີ່ຢູ່ພາຍໃຕ້ຄວາມຮັບຜິດຊອບຂອງຕົນ ຕາມ​ກົດໝາຍ ​ແລະ ລະບຽບການ​ທີ່​ກຳນົດ​ໄວ້;
7. ພົວພັນ, ຮ່ວມມື, ແລກປ່ຽນບົດຮຽນ ແລະ ຂໍ້ມູນຂ່າວສານກັບ ອົງການ ຫຼື ສະຖາບັນການຈັດຕັ້ງທີ່ກ່ຽວຂ້ອງ ທັງພາຍໃນ ແລະ ຕ່າງປະເທດ ບົນພື້ນຖານຕ່າງຝ່າຍຕ່າງມີຜົນປະໂຫຍດ ແລະ ໄດ້ຕົກລົງຮ່ວມກັນ ຕາມການມອບໝາຍຂອງລັດຖະມົນຕີກະຊວງກະສິກຳ ແລະ ປ່າໄມ້;
8. ຈັດຕັ້ງ ແລະ ເຂົ້າຮ່ວມກອງປະຊຸມ, ສຳມະນາ, ທັດສະນະສຶກສາ, ຝຶກອົບຮົມ ແລະ ນຳໃຊ້ສື່ໂຄສະ ນາຕ່າງໆ ທີ່ຖືກຕ້ອງຕາມກົດໝາຍ ເພື່ອເຜີຍແຜ່ຜົນສຳເລັດຂອງວຽກງານ ໃນຄວາມຮັບຜິດຊອບຂອງຕົນຢ່າງກວ້າງຂວາງ;
9. ໃຫ້ບໍລິການວິຊາການ ແລະ ບໍລິການທີ່ປຶກສາ ເພື່ອຊຸກຍູ້ວຽກງານ ຄຸ້ມຄອງ ແລະ ພັດທະນາທີ່ດິນກະສິກຳ ຕາມຫຼັກວິຊາການ ແລະ ລະບຽບກົດໝາຍທີ່ກຳນົດໄວ້;
10. ປະຕິບັດສິດອື່ນ ຕາມການຕົກລົງ ແລະ ມອບໝາຍຂອງຂັ້ນເທິງ.