ວັນທີ 30 ມິຖຸນາ​2021,​ ກົມຄຸ້ມຄອງ ແລະ ພັດທະນາທີ່ດິນກະສິກໍາ ກະຊວງກະສິກໍາ ແລະ ປ່າໄມ້ ຮ່ວມກັບ ພະແນກກະສິກໍາ​ ແລະ ປ່າໄມ້​ແຂວງ​ຈຳ​ປາ​ສັກ​ ໄດ້ຈັດກອງປະຊຸມ​ລິເລີ່ມ​ການຈັດຕັ້ງປະຕິບັດໂຄງການ ຈັດການດິນ,​ ນໍ້າ ແລະ ຝຸ່ນ ເຂົ້າໃນການຜະລິດກະສິກໍາ ໃນເຂດທີ່ມີຄວາມສ່ຽງ ຕໍ່ໄພແຫ້ງແລ້ງ ຂອງ ສປປ ລາວ.​

        ກອງປະຊູມ​ ຈັດຂຶ້ນຢູ່ໂຮງແຮມປາກເຊ ນະຄອນປາກເຊ ແຂວງຈໍາປາສັກ ໂດຍການເປັນປະທານຮ່ວມຂອງ ທ່ານ ປອ.​ນິວົງ ສີປະເສີດ ກຳມະການພັກກະຊວງ, ເລຂາພັກຮາກຖານ, ຫົວໜ້າກົມຄຸ້ມຄອງ ແລະ ພັດທະນາທີ່ດິນກະສິກໍາ ທັງເປັນຜູ້ຊີ້ນໍາໂຄງການ,​ ທ່ານ ປອ.​ສົມລິດ ວິລະວົງ ຮັກສາການຫົວໜ້າພະແນກກະສິກໍາ ແລະ ປ່າໄມ້ ແຂວງຈຳປາສັກ.​ ມີຮອງຫົວໜ້າພະແນກກະສິກໍາ​ແລະ ປ່າໄມ້ ​ແຂວງສະຫວັນນະເຂດ, ຜູ້ຊີ້ນໍາໂຄງການຂັ້ນແຂວງ,​ ບັນດາຫົວໜ້າຂະແໜງ, ຮອງຂະແໜງຄຸ້ມຄອງ ແລະ ພັດທະນາທີ່ດິນ​ກະສິກຳ​, ຫົວໜ້າຫ້ອງການ, ຮອງຫົວໜ້າຫ້ອງການ ກະສິກຳ ແລະ ປ່າໄມ້ເມືອງ,​ ຜູ້ປະສານງານຂັ້ນແຂວງ, ຂັ້ນເມືອງ ທັງ 3 ແຂວງ ສະຫວັນນະເຂດ,​ ຈໍາປາສັກ,​ ສາລະວັນ ພ້ອມດ້ວຍພະນັກງານວິຊາການຈາກສູນກາງ ເຂົ້າຮ່ວມ.

        ໃນໂອກາດກ່າວເປີດກອງປະຊຸມ ທ່ານ ປອ.​ນິວົງ ສີປະເສີດ ຫົວໜ້າກົມຄຸ້ມຄອງ ແລະ ພັດທະນາທີ່ດິນກະສິກໍາ ຜູ້ຊີ້ນໍາໂຄງການ ມີຄໍາເຫັນວ່າ: ພັກ-ລັດ ໄດ້ຖືເອົາວຽກງານກະສິກຳ      ເປັນສຳຄັນໃນການຂັບເຄື່ອນເສດຖະກິດ, ສ້າງວຽກເຮັດງານທຳໃຫ້ປະຊາຊົນເປັນຈຳນວນຫຼາຍ ແລະ ໄດ້ຖືເອົາວຽກງານກະສິກຳ ເປັນວຽກງານຕົ້ນຕໍໃນການຄໍ້າປະກັນສະບຽງອາຫານ ແລະ ຜະລິດເປັນສິນຄ້າ ເຊິ່ງ 3 ແຂວງ ຄື: ສະຫວັນນະເຂດ,​ ຈໍາປາສັກ ແລະ ສາລະວັນ ກໍນອນຢູ່ໃນຂອບເຂດຈຸດສຸມຂອງລັດຖະບານ ໃນການຊຸກຍູ້ສົ່ງເສີມການເປັນແຫຼ່ງຜະລິດສະບຽງອາຫານ ແລະ ຫັນເປັນອຸດສະຫະກຳ ເພື່ອຜະລິດເປັນສິນຄ້າ ສ້າງລາຍຮັບໃຫ້ແກ່ປະເທດຊາດ ເນື່ອງຈາກວ່າ 3 ແຂວງນີ້ ນອນໃນຂອບເຂດທົ່ງພຽງໃຫຍ່ຂອງປະເທດ ເປັນອູ່ເຂົ້າອູ່ປາຂອງປະຊາຊົນພາກກາງ ແລະ ພາກໃຕ້ ແຕ່ກໍຍັງມີຂໍ້ຈຳກັດບາງປະການ ເປັນຕົ້ນແມ່ນບັນຫາໄພທຳມະຊາດຂົ່ມຂູ່ເຊັ່ນ: ໄພແຫ້ງແລ້ງ, ໄພນໍ້າຖ້ວມ ບັນຫາດິນເຊື່ອມໂຊມ, ນໍ້າບໍ່ພຽງພໍ,​ ປະຊາຊົນຂາດຄວາມຮູ້ທາງດ້ານການຈັດການນໍ້າ ເຊິ່ງເປັນສາເຫດຕົ້ນຕໍທີ່ເຮັດໃຫ້ການຜະລິດຂອງປະຊາຊົນບໍ່ມີປະສິດທິພາບເທົ່າທີ່ຄວນ, ເຮັດຫຼາຍໄດ້ໜ້ອຍ, ຕົ້ນທຶນສູງ, ກຳໄລຕໍ່າ, ເຮັດໃຫ້ຊາວກະສິກອນ ແລະ ຜູ້ຜະລິດຈໍານວນໜຶ່ງທໍ້ຖອຍໃຈ ບໍ່ຢາກສືບຕໍ່ຜະລິດ ໂດຍການຊອກຫາອາຊີບອື່ນມາທົດແທນ ເຊັ່ນ: ອາຊີບກຳມະກອນຢູ່ໃນເມືອງ ແລະ ຕ່າງປະເທດ ປະລະພື້ນທີ່ເປົ່າຫວ່າງບໍ່ໄດ້ເຮັດການຜະລິດ ແລະ ອີກປັນຫາໜຶ່ງທີ່ຮ້າຍແຮງທີ່ສຸດໃນປະຈຸບັນກໍຄືການລະບາດຂອງພະຍາດໂຄວິດ 19 ໄດ້ສົ່ງຜົນກະທົບຕໍ່ເສດຖະກິດບ້ານເມືອງ. ຍ້ອນແນວນັ້ນ, ພັກ ແລະ ລັດ ຈິ່ງຫາທຸກວິທີທາງ ເພື່ອຊ່ວຍເຫຼືອປະຊາຊົນ ແກ້ໄຂບັນຫາວິກິດການດັ່ງກ່າວ ໃຫ້ດີຂື້ນເທື່ອລະກ້າວ, ຈິ່ງໄດ້ມີນະໂຍບາຍ ແລະ ວາງແຜນຍຸດທະສາດ ໃຫ້ແທດເໝາະກັບສະພາບການຕົວຈິງ ດ້ວຍການດຶງດູດການລົງທຶນ ກໍຄືຍາດແຍ່ງເອົາການຊ່ວຍເຫຼືອຈາກແຫຼ່ງທຶນຕ່າງໆ ເຂົ້າມາເພື່ອແກ້ໄຂຊິວີດການເປັນຢູ່ຂອງປະຊາຊົນໃຫ້ຢູ່ລອດ ແລະ ເຂັມແຂງຂື້ນ.

      ທ່ານ ປອ.​ນິວົງ ສີປະເສີດ ກ່າວຕໍ່ອີກວ່າ: ໂຄງການຈັດການດິນ, ນໍ້າ ແລະ ຝຸ່ນ ກໍເປັນໂຄງການໜຶ່ງໃນບັນດາໂຄງການຊ່ວຍເຫຼືອຈາກສາກົນ ເຊິ່ງໄດ້ຮັບທຶນສະໜັບສະໜູນຈາກປະເທດ ສ. ເກົາຫຼີ ຜ່ານອົງການແມ່ນໍ້າຂອງ ເພື່ອສ້າງຄວາມເຂັ້ມແຂງດ້ານເສດຖະກິດສັງຄົມຢູ່ໃນຂົງເຂດປະເທດລຸ່ມແມ່ນໍ້າຂອງ, ໂຄງການດັ່ງກ່າວໄດ້ຮັບການອະນຸມັດໃນເດືອນມັງກອນ 2021 ໂດຍຜ່ານກະຊວງ ການຕ່າງປະເທດ ໂດຍແມ່ນ ກົມຄຸ້ມຄອງ ແລະ ພັດທະນາທີ່ດິນກະສິກຳ, ກະຊວງກະສິກຳ ແລະ ປ່າໄມ້ ເປັນເຈົ້າການຈັດຕັ້ງປະຕິບັດ ສົມທົບກັບຄູ່ຮ່ວມງານຂັ້ນແຂວງ-ເມືອງ ລົງສູ່ຂັ້ນບ້ານ ແລະ ຄອບຄົວຜູ້ຜະລິດຕົວຈິງ ໂດຍເນັ້ນໃສ່ເຂດທີ່ມີຄວາມສ່ຽງຕໍ່ກັບໄພແຫ້ງແລ້ງ ຢູ່ເຂດພາກໃຕ້ຂອງ ສປປ ລາວ ມີ 3 ແຂວງ 6 ເມືອງ 12 ບ້ານ 30 ຄອບຄົວ ທີ່ເປັນເປົ້າໝາຍຫຼັກຂອງໂຄງການ ເພື່ອຊຸກຍູ້ການຜະລິດກະສິກຳໃຫ້ມີປະສິດທິພາບ ແລະ ຍືນຍົງ ບັນລຸຕາມແຜນຍຸດທະສາດຂອງວຽກງານກະສິກຳ ແລະ ປ່າໄມ້ ແລະ ສອດຄອງການກັບພັດທະນາເສດຖະກິດ-ສັງຄົມ ຂອງແຂວງ.​ ໂຄງການດັ່ງກ່າວນີ້ແມ່ນມີຄວາມສຳຄັນຫຼາຍຕໍ່ກັບການສ້າງວຽກເຮັດງານທຳ ແລະ ຟື້ນຟູດີນເປົ່າຫວ່າງ, ດິນເຊື່ອມໂຊມໃຫ້ມີການຜະລິດຢ່າງຕໍ່ເນື່ອງຕະຫຼອດປີ ໂດຍຜ່ານເຕັກນິກຈັດການດິນ, ນໍ້າ ແລະ ຝຸ່ນເປັນຢ່າງດີ.

        ໃນກອງປະຊຸມ ໄດ້ນໍາສະເໜີປະສົບການ ແລະ ຜົນສໍາເລັດດ້ານເຕັກນິກໃນການຈັດການດິນ,​ ນໍ້າ ແລະ ຝຸ່ນໃນໄລຍະຜ່ານມາ,​ ນໍາສະເໜີສະພາບລວມຂອງໂຄງການ,​ ຂອບເຂດແນວຄວາມຄິດ ແລະ ຄາດໝາຍຜົນໄດ້ຮັບໃນຕໍ່ໜ້າ,​ ນໍາສະເໜີແຜນຈັດຕັ້ງປະຕິບັດໂຄງການ ໄລຍະປີ 2021​-2023, ນໍາສະເໜີມາດຖານ -​ ເງື່ອນໄຂຄັດເລືອກບ້ານ-ຄອບຄົວ ແລະ ລາຍງານຜົນການຄັດເລືອກຄອບຄົວຕົວແບບ.​ ຈາກນັ້ນ ແຕ່ລະແຂວງ ກໍໄດ້ລາຍງານຜົນຂອງການລົງເກັບກໍາຂໍ້ມູນ ເພື່ອຄັດເລືອກບ້ານເປົ້າໝາຍບ້ານ ແລະ ຄອບຄົວເປົ້າໝາຍໂຄງການ,​ ນໍາສະເໜີແບບຟອມ ແລະ ວິທີການເກັບກໍາ-ສໍາຫຼວດຂໍ້ມູນ ພື້ນຖານຂອງບ້ານ ແລະ ຄອບຄົວຕົວແບບ.​ ພ້ອມນີ້ ໃນກອງປະຊຸມ​ຍັງໄດ້ປຶກສາຫາລືຄົ້ນຄ້ວາປະກອບຄໍາເຫັນ ເພື່ອເຮັດໃຫ້ການຈັດຕັ້ງປະຕິບັດວຽກງານໂຄງການ ມີຜົນສໍາເລັດຕາມຄາດໝາຍທີ່ວາງໄວ້.​ ພາຍຫຼັງ​ສໍາເລັດກອງປະຊຸມ  ທີມງານໂຄງການ ຍັງໄດ້ເຄື່ອນໄຫວພົບປະຄະນະພັກ-ອົງການປົກຄອງບ້ານ ແລະ ພໍ່ແມ່ປະຊາຊົນ ຢູ່ບ້ານເປົ້າໝາຍ ໃນ 2 ເມືອງ ຂອງແຂວງຈໍາປາສັກ ຕື່ມອີກ.​

      * ຂ່າວ-ພາບ: ທູນທອງໃຈ​ ​​*​

10,321 Comments