ກອງປະຊຸມດ​ຝຶກ​ອົບ​ຮົມ ນະ​ວັດ​ຕະ​ກຳ​ການ​ເຮັດ​ຝຸ່ນ​ບົ່ມ ແລະ ການ​ປັບ​ປຸງ​ດິນ ໃຫ້​ກັບ​ພະ​ນັກ​ງານ​ຂະ​ແໜງ​ຄຸ້ມ​ຄອງ ແລະ ພັດ​ທະ​ນາ​ທີ່​ດິນ​ກະ​ສິ​ກຳ

ໃນລະ​ຫວ່າງ ​ວັນ​ທີ 20 ຫາ 21 ເມ​ສາ ​ທີ່​ຜ່ານ​ມາ, ສູນ​ພັດ​ທະ​ນາ​ທີ່​ດິນ ແລະ ຄຸ້​ມ​ຄອງ​ການ​ນຳ​ໃຊ້​ຝຸ່ນ​ ກົມ​ຄຸ້ມ​ຄອງ ແລະ ພັດ​ທະ​ນາ​ທີ່​ດິນ​ກະ​ສິ​ກຳ (ຄ​ພດກ) ກະ​ຊວງ​ກະ​ສິ​ກຳ ແລະ ປ່າ​ໄມ້ ບ້ານ​ໜອງວຽງ​ຄຳ ເມືອງ​ໄຊ​ທາ​ນີ ນະ​ຄອນຫຼວງວຽງ​ຈັນ ໄດ້​ມີ​ການ​ຈັດ​ຝຶກ​ອົບ​ຮົມ ໃນ​ຫົວ​ຂໍ້: ນະ​ວັດ​ຕະ​ກຳ​ການ​ເຮັດ​ຝຸ່ນ​ບົ່ມ ແລະ ການ​ປັບ​ປຸງ​ດິນ ໃຫ້​ກັບ​ພະ​ນັກ​ງານ​ຂະ​ແໜງ​ຄຸ້ມ​ຄອງ ແລະ ພັດ​ທະ​ນາ​ທີ່​ດິນ​ກະ​ສິ​ກຳ ທີ່​ເປັນ​ເປົ້າ​ໝາຍ​ຂອງ​ໂຄງ​ການ ພັດ​ທະ​ນາ​ພື້ນ​ຖານ​ໂຄງ​ຮ່າງ​ກະ​ສິ​ກຳ.

ຈຸດ​ປະ​ສົງ​ຂອງ​ໂຄງ​ການກໍ່​ເພື່ອ​ຜະ​ລິດ​ຜົນ​ກະ​ສິ​ກຳ​ໃຫ້​ມີ​ຄວາມ​ສະ​ອາດ ແລະ ປອດ​ໄພ ໂດຍ​ເນັ້ນ​ໃສ່​ການ​ຜະ​ລິດ​ຊີ້ນ ແລະ ປາ​ ເປັນຫຼັກ ພ້ອມ​ທັງ​ພືດ​ຜັກ ແລະ ໝາກ​ໄມ້​ອື່ນໆ ເປັນ​ສ່ວນ​ປະ​ກອບ ໂດຍ​ມີ ກົມ​ຄຸ້ມ​ຄອງ ແລະ ພັດ​ທະ​ນາ​ທີ່​ດິນກະ​ສິ​ກຳ, ກົມ​ປູກ​ຝັງ, ກົມ​ລ້ຽງ​ສັດ ແລະ ການ​ປະ​ມົງ, ​ສະ​ຖາ​ບັນ​ຄົ້ນ​ຄວ້າ​ກະ​ສິ​ກຳ ແລະ ປ່າ​ໄມ້ ແຫ່ງ​ຊາດ ແລະ ​ມະ​ຫາ​ວິ​ທະ​ຍາ​ໄລ​ແຫ່ງ​ຊາດ ເປັນ​ຜູ້​ຈັດ​ຕັ້ງ​ປະ​ຕິ​ບັດ​ໂຄງ​ການ​ຮ່ວມ​ກັນ​ຕາມ​ໜ້າ​ວຽກ​ທີ່​ກ່ຽວ​ຂ້ອງ​ຂອງ​ແຕ່​ລະ​ພາກ​ສ່ວນ.

ສຳ​ລັບ​ຈຸ​ດປະ​ສົງ​ໃນ​ການ​ຝຶກ​ອົບ​ຮົມ​ໃນ​ຄັ້ງ​ນີ້​ກໍ​ເພື່ອ ເນັ້ນ​ໃຫ້​ພະ​ນັກ​ງານ​ຂະ​ແໜງ​ຄຸ້ມ​ຄອງ ແລະ ພັດ​ທະ​ນາ​ທີ່​ດິນ​ກະ​ສິ​ກຳ​ປະ​ຈຳ​ທ້ອງ​ຖິ່ນ ໃຫ້​ຮູ້​ເຖິງ​ຄວາມ​ໝາຍ ​ຄວາມ​ສຳ​ຄັນ​ຂອງການ​ຈັດ​ການ​ດິນ ນະ​ວັດ​ຕະ​ກຳ​ຂອງ​ການ​ເຮັດ​ຝຸ່ນ​ບົ່ມ​ທີ່​ໃຊ້​ເວ​ລາ​ສັ້ນ ແລະ ນຳ​ໃຊ້​ເຂົ້າ​ໃນ​ການການ​ປັບ​ປຸງ​ດິນ​ໃຫ້​​ນຳ​ໃຊ້​ໄດ້​ຢ່າງ​ຍືນ​ຍົງ. ​ເພື່ອ​ໃຫ້​ເຂົາ​ເຈົ້າ​ສາ​ມາດ​ຖ່າຍ​ທອດ​ໃຫ້​ຊາວ​ກະ​ສິ​ກອນ​ໄດ້​ໃນ​ຂັ້ນ​ຕໍ່​ໄປ. ການ​ຝຶກ​ອົບ​ຮົມ​ໃນ​ຄັ້ງ​ນີ້​ມີ​ຜູ້​ເຂົ້າ​ຮ່ວມ​ທັງ​ໝົດ 37 ທ່ານ​ເຊິ່ງ​ມາ​ຈາກ:

ນະ​ຄອນຫຼວງວຽງ​ຈັນ 5 ທ່ານ;ແຂວງວຽງ​ຈັນ 5 ທ່ານ;ແຂວງ​ໄຊ​ຍະ​ບູ​ລີ 5 ທ່ານ;ແຂວງຫຼວງ​ພະ​ບາງ 5 ທ່ານ;ແຂວງ​ອຸ​ດົມ​ໄຊ 5 ທ່ານ;ແຂວງ​ຊຽງ​ຂວາງ 5 ທ່ານ;ແລະ ກົມ ຄ​ພດກ 7 ທ່ານ.

ໃນ​ຕອນ​ເຊົ້າ​ຂອງວັນ​ທີ 20 ພຶດ​ສະ​ພາ ເປັນ​ກຽດ​ໃນ​ການ​ເປີດ​ການ​ຝຶກ​ອົບ​ຮົມ​ໃນ​ຄັ້ງ​ນີ້ ໄດ້​ແກ່​ທ່ານ ອາ​ໂນ​ລາດ ຈັນ​ທະ​ວົງ​ສາ ຮອງ​ຫົວ​ໜ້າ​ກົມ ຄ​ພດກ. ເຊິ່ງ​ທ່ານ​ໄດ້​ເນັ້ນ​ໃຫ້​ຜູ້​ເຂົາ​ຮ່ວມ​ທັງ​ໝົດ​ໄດ້​ເກັບ​ກ່ຽວ​ເອົາ​ບົດ​ຮຽນ ແລະ ປະ​ສົບ​ການ​ຈາກ​ຊ່ຽວ​ຊານ​ໃຫ້​ໄດ້ຫຼາຍ​ທີ່​ສຸດ. ຈາກນັ້ນ ທ່ານ ປອ ຊອດ ວາ​ກາ (Dr. Zsolt Varga) ໄດ້​ໃຫ້​ຄວາມ​ຮູ້​ກ່ຽວ​ກັບ ຝຸ່ນ​ບົ່ມ ແລະ ການ​ນຳ​ໃຊ້​ຝຸ່ນ​ບົ່ມ​ຕໍ່​ການ​ປັບ​ປຸງ​ດິນ, ​ວີ​ທີການ​ນຳ​ໃຊ້​ເຄື່ອງ​ເຜົາ​ຖ່ານ ແລະ ຕູ້​ບົ່ມ​ຝຸ່ນ​ທີ່​ທາງ​ໂຄງ​ການມອບ​ໃຫ້ ແກ່​ກຸ່ມ​ຊາວ​ກະ​ສິ​ກອນ​ເປົ້າ​ໝາຍ​ຂອງ​ໂຄງ​ການ. ຈາກນັ້ນ​ໃນ​ຕອນ​ບ່າຍ ທ່ານ ປອ. ອະດຳ ຊໍ​ບາ (Dr. Adam Csorba) ໄດ້ໃຫ້​ຄວາມ​ຮູ້​ທາງ​ອອນ​ລາຍ ຈາກ​ປະ​ເທດ​ຮັງ​ກາ​ຣີ ເລື່ອງ​ຄວາມ​ຮູ້​ພື້ນ​ຖານ​ດິນ​ກະ​ສິ​ກຳ, ວິ​ວັດ​ທະ​ນາ​ການ​ການ​ກຳ​ເນີດ​ດິນ, ການ​ສຳຫຼວດ​ດິນ ແລະ ການ​ພັນ​ລະ​ນາ​ຂຸມ​ດິນ. ຕໍ່​ຈາກນັ້ນ ທ່ານ​ສາດ​ສະ​ດາ​ຈານ ອີ​ຣິກ​ກາ ມິ​ເຊວ​ລີ (Prof. Erika Micheli) ໄດ້​ໃຫ້​ຄວາມ​ຮູ້​ກ່ຽວ​ກັບ​ວິ​ທີ​ການ​ຈຳ​ແນກ​ດິນ​ຕາມ​ວິ​ທີ​ປັບ​ປຸງ​ໃໝ່ ປີ 2014 (world reference base for soil resource, 2014). ຂອງ​ອົງ​ການ​ອາ​ຫານ ແລະ ການ​ກະ​ເສດ​ແຫ່ງ​ສະ​ຫະ​ປະ​ຊາ​ຊາດ (FAO).

ວັນ​ທີ 21 ເມ​ສາ 2021 ຝຶກ​ພາກ​ປະ​ຕິ​ບັດ​ຕົວ​ຈິງ ທີ່​ຟາມ ພີ​ພີ​ຊີ ບ້ານ​ນາ​ບອນ ເມືອງ​ໂພນ​ໂຮງ ​ແຂວງວຽງ​ຈັນ ​ເຊິ່ງ​ເປັນ​ຟາມ​ຕົວ​ແບບ​ໃນ​ການ​ລ້ຽງ​ງົວ ໃນ​ນີ້​ມີ​ການ​ສາ​ທິດ​ການ​ໃຊ້​ເຄື່ອງ​ເຜົາ​ຖ່ານ ແລະ ການ​ໃຊ້​ເຄື່ອງ​ບົ່ມ​ຝຸ່ນ.ຈາກນັ້ນ​ໄດ້​ຢ້ຽມ​ຊົມ​ການ​ປັບ​ປຸງ​ດິນ​ສວນ​ຫ​ຍ້າ​ອາ​ຫານ​ສັດ ໂດຍ​ໃຊ້​ສິ່ງ​ເສດ​ເຫຼືອ​ຈາກ​ຟາມ ເຊິ່ງ​ຄູ​ຝຶກ​ໄດ້​ສະ​ແດງ​​ໃຫ້​ຜູ້​ເຂົ້າ​ຮ່ວມເຫັນ​ສະ​ພາບ​ຄວາມ​ແຕກ​ຕ່າງ​ຢ່າງ​ຊັດ​ເຈນ​ຂອງ​ສວນ​ຫ​ຍ້າ​ທີ່​ໄດ້​ຮັບ​ການ​ປັບ​ປຸງ​ດິນ ແລະ ສວນ​ທີ່ບໍ່​ໄດ້​ຮັບ​ການ​ປັບ​ປຸງ​ດິນ.ພ້ອມ​ດຽວ​ກັນ​ນີ້​ທາງ​ຄູ​ຝຶກ​ໄດ້​ເນັ້ນ​ໃຫ້​ນັກ​ຝຶກ​ອົບ​ຮົມ ໄດ້​ເຫັນ​ຄວາມ​ໝາຍ​ຄວາມ​ສຳ​ຄັນ​ຂອງ​ການ​ປັບ​ປຸງ​ດິນ. ການ​ຝຶກ​ອົບ​ຮົມ​ສິ້ນ​ສຸດ​ລົງ​ໃນ​ຄາບ​ເຊົ້າ.